У Гродна да праекта далучыліся сямёра студэнтаў, будучыя юрысты, гісторыкі, дызайнеры, лінгвісты, сацыёлагі. Цікава, што сярод удзельнікаў ёсць адзін «не гуманітарый»: студэнтка медычнага ўніверсітэта, для якой гісторыя роднага горада любімае хобі.
У першы дзень уводнага семінара, што адбываўся ў офісе гродзенскага партнёра праекта, грамадскага аб’яднання «Цэнтр «Трэці Сектар», удзельнікі пазнаёміліся паміж сабой і са сваімі калегамі з Кішынёва і Чарнаўцоў пад час сесіі ў Google Meetings.
Дырэктар яўрэйска-хрысціянскага дыялогу «Shomer International» Яўген Калодзін расказаў студэнтам пра помнікі Халакосту, што ўсталёўваліся ў Беларусі пасля сканчэння ІІ Сусветнай вайны да сённяшняга дня. Яўген адзначыў, што ў савецкі час ініцыятывы ўвекавечыць памяць пра загінулых яўрэяў у большасці выпадкаў сустракаліся з чыноўніцкай бюракаратыяй і палітыкай антысемітызму. Напрыклад, у музеі Вялікай Айчыннай вайны Халакосту прысвечаны адзін стэнд. У перыяд незалежнай Беларусі шмат помнікаў і шыльдаў ўдалося ўсталяваць яўрэйскім супольнасцям, у тым ліку дзякуючы ўраду Германіі, дзе падтрымка мемарыялізацыі Халакосту з’яўляецца часткай палітыкі пакаяння, адзначыў Яўген Калодзін.
